麻園歷史介紹影片(3)--戴草帽的蔴園庄

這一集，從基隆到大甲的北台灣人都適合看，因為片中涵蓋到這些地方的歷史了，為什麼講麻園的歷史可以扯到北台灣這麼大的範圍啊?

自己慢慢欣賞囉!

歡迎轉發到家族的Line群組上去!

==========文字稿==========

麻園个鄉親序大逐家好！ 我是阿權, 歡迎收看麻園歷史真趣味！

古早時个麻園是有戴帽仔, 發草eh. 所以你若看著有人按呢寫(蔴園), 彼毋是寫毋著，這是古早个寫法。

咱治第一集有講過(kèr)，麻園个歷史, 會使對268年前ê 1749年、乾隆14年起算, 因為歷史對這年開始有講著咱麻園ê代誌.

13年後，抑著是1762年、乾隆27年，麻園才設庄, 開始有行政地位。 麻園庄屬治淡水廳管轄，請毋通共這馬个新北市淡水區和淡水廳想做是仝一個，新北市淡水區治古早彼當陣名叫滬尾，淡水廳ê行政中心窮實是治咱這馬个新竹市，彼當陣叫竹塹城，毋是治這馬个淡水。所以治彼當陣，人若講起淡水廳，應該是會先想著咱竹塹城。

大清國時代，淡水廳个範圍誠闊，北爿對基隆、滬尾、Kan-tāu，一直到南爿个苗栗中港、通霄、大甲溪，以這馬來講，著是基隆、台北、新北、桃園、新竹，苗栗縣以及台中大甲，攏是屬治咱竹塹个淡水廳所管轄。 淡水廳即呢闊个所在，治1762年進前，清國政府只干焦共割做35个庄。1762這一年，清國政府共這35庄重割（tiông-koah）做132庄, 其中有一庄to̍h是咱蔴園庄,彼當陣，抑著是255年前个1762年，治咱這馬竹北市這角頭仔，無竹北庄, 無新社庄, 只有咱蔴園庄甲貓兒錠庄。 咱麻園歷史真久長, 治竹北這角位仔， 只干焦較輸貓兒錠，頭前咱講著淡水廳原早只有35庄，其中一庄是貓兒錠庄。所以咱麻園庄个歷史是比貓兒錠庄較慢一屑仔。但是呢，你若欲治基隆台北新北桃園新竹以及苗栗縣即呢闊个所在來比較，這馬攏總2798个村里，麻園庄是排治上頭前个135庄之一。講起來，咱麻園人行路，尾椎會使khiàu甲懸懸懸！

咱來看一張乾隆時代ê台灣地圖。畫（ūi）成這幅地圖个確實年份無人知, 人攏叫這幅圖做〈乾隆台灣輿圖〉, 所以會當確定這幅圖是治乾隆朝畫（ūi）--ê。治竹塹城北爿, 你會當看著樹林頭甲咱蔴園庄. 這是咱麻園頭一擺出現治地圖頂，真寶貴！以後歷史博物館若有展出這幅圖, 你會使專工去看覓！

佇這幅圖，咱會當看著乾隆時代个蔴園有發草。窮實一直到日本時代初期（1900nî以後），麻園猶閣是有戴帽仔、有發草。

治1920年, 日本天皇大正第9年，麻園个草帽仔才無去。所以，這个寫法ê麻園，其實無甲一百年，看khiai猶閣真新。1920年, 日本天皇大正第9年，到底發生啥meh代誌, 致使麻園个草帽仔pháng無去ne？ 咱後一集才來講透機。